Pranohet ankesa në një rast të zhvatjes

Një trup gjykues i përbërë nga një gjyqtar i EULEX-it dhe dy gjyqtarë të Kosovës, i kryesuar nga gjyqtari i EULEX-it, në Gjykatën Supreme e pranoi pjesërisht ankesën në një rast të zhvatjes.

Ankesa e parashtruar në emër të pandehurit N.T. u pranua pjesërisht dhe dënimi i tij me burgim u ndryshua prej dy në një vjet burgim. Ankesa e parashtruar në emër të pandehurit B.T. u refuzua si e pabazuar dhe u vërtetua dënimi i tij prej 3 vjet burgim. Të dy personat u shpallën fajtorë për kryerje të veprës së zhvatjes në bashkëkryerje.

Të pandehurit i kanë zhvatur 20,000 euro nga dy vëllezër duke i kërcënuar ata, familjen dhe biznesin e tyre në prill 2011 në Gjilan.

Rasti është ndjekur penalisht nga një prokuror i EULEX-it nga Prokuroria Speciale e Kosovës.