Gjykata Supreme kthen në rigjykim lëndën kundër gjashtë personave të akuzuar për krime lufte

Trupi gjykues i përbërë prej tre gjyqtarëve të EULEX-it dhe dy gjyqtarëve vendas, i kryesuar nga një gjyqtar i EULEX-it në Gjykatën Supreme, e ka kthyer në rigjykim lëndën kundër gjashtë të pandehurve në pjesën e dytë të ashtuquajturit rastit Kleçka.

Trupi gjykues i Gjykatës Supreme e miratoi ankesën e Prokurorit Special të EULEX-it dhe e anuloi vendimin e gjykatës së shkallës së parë, i cili i kishte liruar nga akuza A.K., B.L., R.M., S.Sh., Sh.Sh. dhe B.Sh.. Mes tjerash, të pandehurit ishin akuzuar për krime lufte kundër popullatës civile dhe të burgosurve të luftës. Po ashtu, trupi gjykues e shpalli të pranueshme dëshminë e A.Z., i njohur edhe si “dëshmitari X”, si dhe provat e mbledhura gjatë bastisjes së objekteve të N.K. dhe F.L..

Rasti Kleçka ishte ndarë në dy pjesë nga Gjykata e Qarkut në Prishtinë, për çka ishin nxjerrë dy vendime. Gjykata në atë kohë e kishte shpallur dëshminë e A.Z. si të papranueshme dhe i kishte liruar nga akuza të gjithë të pandehurit përmes të dyja vendimeve.

Muajin e kaluar, Gjykata Supreme e kishte kthyer në rigjykim lëndën për katër të pandehurit e tjerë të liruar nga Gjykata e Qarkut në Prishtinë përmes njërit nga vendimet lidhur me këtë rast.

Rastin e ka ndjekur penalisht një prokuror special i EULEX-it nga Prokuroria Speciale e Kosovës (PSRK), të cilën në procedurën ankimore e ka përfaqësuar një prokuror i EULEX-it nga Prokuroria e Shtetit e Kosovës.