Paraburgim për pesë të dyshuar në një rast të kontrabandës me emigrantë

12 dhjetor 2013

Dje, me kërkesë të një prokurori ndërkombëtar të Prokurorisë Speciale të Kosovës (PSRK), një gjyqtar ndërkombëtar i procedurës paraprake i Gjykatës Themelore në Prishtinë, e ka caktuar masën e paraburgimit në kohëzgjatje prej një muaji për pesë persona të dyshuar për krim të organizuar dhe kontrabandë me emigrantë.

Më 10 dhjetor 2013, pjesëtarët e Departamentit të Krimeve të Organizuara të Policisë së Kosovës dhe Njësisë për Hetimin e Krimit të Organizuar të Policisë së EULEX-it, duke vepruar nën drejtimin e një prokurori ndërkombëtar të PSRK-së dhe në bashkëpunim me Europol-in dhe me autoritetet hungareze, i kanë kryer disa operacione të përbashkëta për arrestime dhe bastisje në rajonet e Skenderajt dhe të Rahovecit. Ky ishte kulminacioni i hetimeve shtatë-mujore lidhur me kontrabandën me emigrantë nga Kosova për në Hungari, dhe pastaj më tutje në Bashkimin Evropian. Me atë rast u arrestuan pesë persona duke e përfshirë një prej organizatorëve kryesorë. Një aksion i ngjashëm ishte kryer tashmë edhe në Hungari.