Më 19 maj 2025, Misioni i Bashkimit Evropian për Sundim të Ligjit në Kosovë (EULEX), në koordinim me Misionin e OSBE-së në Kosovë, organizoi një tryezë diskutimi duke ofruar një platformë për të identifikuar mënyrat për të përmirësuar mekanizmat e parandalimit dhe mbrojtjes për viktimat e dhunës në familje.

Duke patur parasysh rolin thelbësor që Këshillat Komunale të Sigurisë në Bashkësi (KKSB) luajnë në rritjen e ndërgjegjësimit në mesin e komuniteteve për fenomenin e dhunës me bazë gjinore dhe në forcimin e mekanizmave të parandalimit dhe mbrojtjes, eventi mblodhi përfaqësues të lartë nga Këshilli Komunal i Sigurisë në Bashkësi (KKSB) i Graçanicës, zyrtarë të EULEX-it dhe OSBE-së, si dhe udhëheqës të komunitetit dhe besimeve fetare.

Duke hapur diskutimin, Këshilltarja e EULEX-it për çështje gjinore, Chiara Tagliani, shprehu mirënjohje për Misionin e OSBE-së në Kosovë për fasilitimin e eventit dhe theksoi rëndësinë e përpjekjeve bashkëpunuese dhe të një qasjeje shumësektoriale në trajtimin e kësaj çështjeje kaq të rëndësishme. Koordinatorja e KKSB-së në Graçanicë, Milica Krstić, riafirmoi angazhimin e palëkundur të Këshillit për të luftuar dhunën në familje, duke nënvizuar rëndësinë e angazhimit të vazhdueshëm institucional dhe të komunitetit.

Duke shtuar një perspektivë të bazuar në besim, Kryetari i Bashkësisë Islame në Prishtinë njëherësh anëtar i KKSB-së në Graçanicë, Imami Hetem Sopjani, theksoi se, si mjet parandalues, mesazhet që dënojnë dhunën në familje jepen rregullisht gjatë namazit të së premtes, në koordinim me Ministrinë e Punëve të Brendshme.

EULEX-i përsëriti angazhimin e tij të vazhdueshëm për të bashkëpunuar ngushtë me institucionet e Kosovës dhe shoqërinë civile për të përmirësuar parandalimin, mbrojtjen dhe ndjekjen penale që lidhen me rastet e dhunës në familje.